West Brom vs Arsenal: Aubameyang and Bukayo Saka on target as Arsenal cruise to Carabao Cup victory

Arsenal record dia first win of di new season as dem waya West Brom 6-0 for Carabao Cup.

Captain Pierre-Emerick Aubameyang mark e first start of di season for di gunners wit score hat-trick of goals.

Before di game, Arsenal players and dia coach bin face criticism from fans as dem open di season wit back-to-back defeats to Brentford and Chelsea.

Di gunners respond to dia critics wit fine first half performance wey see dem score three goals before di break.

Aubameyang open di scoring for di 17th minute as e tap in rebound from close range afta West Brom goalkeeper, Alex Palmer save Bukayo Saka shot.

Di Gabon striker double dia lead wit anoda tap in afta Nicolas Pepe shot rebound off di post come fall for im path.

Aubameyang den turn provider as e assist Pepe just before half time.

Arsenal look sharp and different from di side wey lose to Chelsea as dia pam pam passing cut West Brom defence open repeatedly.

Na through dat one touch football di fourth goal come as Odegaard cooly set up Saka to put im name for di score sheet.

Aubameyang complete im hat-trick as e curl one fine shot beyond Palmer for di 63rd minute.

Arsenal substitute Alexander Lacazette wey just recover from Covid-19 na im score di sixth goal.

New signing, Aaron Ramsdale mark im first match wit di club wit some good saves as e deny West Brom from scoring consolation goal.

Fans go wait to see if di gunners go carry dis fine form into dia weekend game against Manchester City for Premier League.

For West Brom, winning di Carabao Cup no go dey part of dia ambition dis season but dem go hope to continue dia bid to return to di Premier League after dem suffer relegation last season.